| تبليغات | X |
 |
 |
|
| Dramatic Literature |
|
... کوچه لری دولان با دولان
اشخاص
صمد: آرشيتئكت لاله: شاعير
زامان: هرناواخت مكان: قوربت
صمد صحنه نين بير طرفينده آرشيتئكتورلوق ميزينين داليسيندا بير طرحين اوستونده ايشله يير، آمّا سانكي فيكريني بير يئره ييْغا بيلمير. لاله ايسه صمد اوْلان طرفين موخاليفينده كامپيوتئر داليسيندا اَيله شيب نه ايسه يازماق ايسته يير، آنجاق ائله صمد كيمي فيكريني پوْزغونلوقدان چيْخارا بيلمه ين كيمي گؤرونور. بير مودّت بئله سوْووشاندان سوْنرا ياواشجا قاپي دؤيولور. صمدله لاله بيرليكده – ساغدان و سوْلدان – قاپييا ساري قاچيْرلار، صحنه نين اوْرتاسيندا بير- بيرلرينه راس گليب دايانيرلار.
لاله: ... صمد: ... لاله: هه؟! مننن ايشين وار ايدي؟ صمد: يوْخ، من دئديم بس سنين مننن ايشين وار. لاله: آها... (آرا) آمّا من كي سني سسله مه ديم. صمد: ائ!... هه... نم- نييه دئديم بس بير سس ائشيتديم. لاله: ائئئئئئئئ!... سن ده ائشيتدين؟! صمد: بَيه سن ده ائشيتدين؟! لاله: هه، دييه سن تيْققيلتييا اوْخشار بير سس ائشيتديم. صمد: هه، هه، آي ساغ اوْل، ائله من ده دقيقاً تيْققيلتي ائشيتديم. لاله: پس من ائشيده ني سن ده ائشيديبسن. صمد: هه، من ائشيده ني ده سن ائشيديبسن. لاله: جاليب دي. صمد: اؤزوده من ائشيدن تاققيلتي دييه سن... دييه سن... زاد سسي ايدي... شئي تيْققيلتيسي... لاله: قاپي...؟! صمد: ههههههه... آي ساغ اوْل... منيم نظريمه گلن ائله سنين ده نظريوه گليب. لاله: هه، نظردي دا... گلير... گئدير... صمد: هن. (آرا) سن ائله بيل بير يئره گئديردين، هه؟ لاله: من؟! هن، هن، گئديرديم چاي تؤکم. سن ده ايچيرسن؟ صمد: بوْشالتسان ايچه ريق دا، قوْخموروق كي.
لاله آشپزخانايا ساري، صمد ايسه ميزينه ساري يوْلا دوشورلر. بير نئچه آدديمدان سوْنرا دايانيب فيكره گئديرلر. هره سي فيكره جومموش گلدييي يوْلو قاييديرلار. بير- بيرلرينه يئتيشنده باشلاريني قالخيزيب بير- بيرلرينه باخيرلار، آنجاق يالنيز باخيشلاري ايله دانيشيرلار.
صمد: ... لاله: ... صمد: سن بير كسي گؤزلوسن؟ لاله: ... صمد: ... لاله: پس سن ده هئش كيمنن قرارين يوْخدو. صمد: ... لاله: ... صمد: نه ديييم والله. لاله: ... صمد: ... لاله: جاليب دي.
ايكيسي ده ميزلرينين باشينا قاييديرلار. اؤزلريني مشغول گؤسته ريرلر، آنجاق باياقدان دا آرتيق فيكيرلري پوْزغوندور. صمد چؤنوب قاپييا باخير، دئيه سن بيريني گؤزله يير. صمد يئرينه قاييداندان آزجا سوْنرا لاله چؤنوب – صمد كيمي – گؤزلريني قاپييا زيلله يير. آزجا سوْنرا قاييديب اوّلكي كيمي اوْتورور. آرا. ايكيسي ده بير آز يئرلرينده ويْرنيخاندان سوْنرا بيردن- بيره چؤنوب بير- بيرلرينه بير اوْرتاق سؤز دئمك ايسته ييرلر:
صمد له لاله: (بيرليكده) آرزي...
يئنه يئرلريندن دوروب صحنه نين اوْرتاسينا قاچيب اوزبه اوز دايانيب يئيين دانيشيرلار.
صمد: پس سن ده منه تاي. لاله: نييه من سنه تاي؟ سن منه تاي. صمد: بابا نه فرق ائلر... تاي تاي دي دا... يا دويو تايي يا باشماق تايي... لاله: يوْخ، اوْندا تاي با تاي اوْلار. صمد: حتماً منظورون تاي دَييشيكدي دا،هن؟ لاله: خئيير، اوْنو باشماغا ايشله درلر. من دويونو ديييرديم. صمد: اصلاً گه بير ايش گؤراق: بي تايي سنين، بي تايي منيم. لاله: (آزجا فيكيرلشندن سوْنرا اوْخوماغا باشلايير) چوْخ گؤزل فيكيردير آل سنه قوربان. صمد: ياخچي، وئر آليم دا. لاله: نمنه ني؟ صمد: بي تايين دا. لاله: هه، بي تايين... (اطرافا باخا- باخا فيكيرلشير) ديييرم گل آختاراق، بي تايين سن تاپ بي تايين من. صمد: (اوْخويور) چوْخ گؤزل فيكيردير... (قيْريب فيكيرلشير) ...تاپ سنه قوربان.
ايكيسي ده باشلاييب اوْتاغي آختاريرلار. بو حئينده اؤز- اؤزلري ايله ده دانيشيرلار.
لاله: تاپ بو نه دي تاپماجا... صمد: اوْ نمنه دي كي ايكي تايي وار... لاله: ايكي تايليدي... صمد: اوْ تاي- بو تاي...
هر ايكيسيده اوْ تاي- بو تايي ائشيدنده دوروخورلار.
لاله: اوْ تاي- بو تاي...
فيكيرلشيرلر.
صمد له لاله: اوْ تاي- بو تاي...
بو سؤز اوْنلاري بير زادين يادينا سالير. اينديجه لاله ايله صمد هره سي صحنه نين بير طرفينده ديرلر. لاله چؤنوب صمده باي- باي ائله يير. ائله دانيشيرلار دئيه سن بير- بيرلريندن چوْخ اوزاقديرلار.
لاله: سلااااااااام. صمد: (بيردن چؤنوب لاله يه باخير) ائ... سن نييه اوْ تايدا قاليبسان؟ لاله: بيلميرم... ديييرم بس بوراني تاي با تاي ائليييبلر. صمد: منظورون تاي دَييشيك دي دا هن؟ لاله: خئير، اوْنو جوْرابا ايشله درلر. صمد: ايندي من نئينيييم؟ لاله: هئش زاد، دوش سويا، چيم، گل بو تايا، مني قاچيرت. صمد: گؤرموسن سو نه زوْر گئدير؟ فيكر ائله ميسن دوشسم سويا مني آپارار؟ لاله: اوْسسون... اوْندا هر ايكيميزده افسانه لره قوْشولاريق... هئش كيم بيلمز من سني سودا بوْغموشام يا سن اؤزون بوْغولوبسان... صمد: آخي سويون قره باليقلاري مني يييرلر. لاله: بابا اوْلاري كي اؤزون بئجرديبسن، سننن ايشلري اوْلماز. صمد: هه، دوز ديييرسن... شئيدي... زاددي... نمنه دي... ديييرم منيم بير سواليم وار... لاله: تئز اوْل... صمد: ديييرم آخي نييه من گرك گلم سني قاچيردام؟ لاله: نييه؟!! صمد: بلي، نييه؟ لاله: بَيه خبرين يوْخدو؟ بشيرخان منه ائلچي دوروب، يوبانسان مني زوْرونان دا اوْلموش اوْلسا آپارار. صمد: يوْخ بابا!!! لاله: سن اؤل. صمد: ديييرم پس اوْندا بير ايش گؤر... سن گل اؤزووو آت سويا قوْي آپارسين سئل سني، كئچمه قورد دالداسينا، قوْي يئسين آسلان سني... لاله: يوْخ بابا... صمد: به نمنه... اوْندا لاپ راحات افسانه لره قوْشولماق اوْلار... اوْندا دونيا واركن اوْخوياجاقلار (بير گيتار بئيس الينه آليب چالير) آپاردي سئللر...
لاله اوْيونو وورور بير- بيرينه. صحنه نين اوْ تاييندان صمد اوْلان تايا گليب گيتار بئيسي اوْنون اليندن آليب اوْيانا آتير.
لاله: نه خئيرم بو اوْلمادي.
صمد هله چالماق اداسيني ساخلاييب سازسيز چالماغا داوام وئرير. ياواش- ياواش اؤزونه گليب دايانير. هر ايكيسي دالغيْن.
صمد: اوْلمادي؟!... هه، دييه سن اوْلمادي... لاله: ياخچي گلميشدي ها... صمد: (اوشاقيانا) اصلاً من اوْيناميرام.
صمد گئديب ميزينين داليندا اوْتورور، ايشينه مشغول اوْلور. لاله ده اوْنون دالينجا اوشاقيانا آغيز اَيير، گئديب ميزينين داليندا اَيله شير. هر ايكيسي تلاطومده. هر ایکیسی فیکیرلرینی پوزغونلوقدان چیخارا بیلمه ین کیمی گؤرونورلر. بير مودّت بئله سوْووشاندان سوْنرا ياواشجا قاپي دؤيولور. صمدله لاله بيرليكده – ساغدان و سوْلدان – قاپييا ساري قاچيْرلار، صحنه نين اوْرتاسيندا بير- بيرلرينه راس گليب دايانيرلار. تاماشانی بیر داها اوّلدن اویناییرلار آنجاق بو دفعه چوخ یئیین و سسسیزجه سینه؛ دئیه سن فیلمی یئیین سرعتله قاباغا ووروبلار. بو حینده پرده باغلانماغا باشلاییر.
سون
|
|
+ نوشته شده در
87/12/20ساعت 4:42 توسط آيدين سرداري نيا |
|
|
صفحه نخست پست الکترونیک آرشیو |
| درباره وبلاگ |
• Aidin Sardarynia
• Born in 1986, Tabriz • English Language and Literature Student • Activities: Directing of Theatre, Dramatic Literature, Translation, Writing, … |
|
RSS
|